Doktorantura we aspirantura kabul etmegiň tertibi çap edildi
Türkmenistanyň resmi metbugatynda aspirantura girmek üçin gerek bolan resminamalaryň sanawy çap edildi. Şolaryň içinde şu resminamalaryň bolmagy zerurdyr:
- ýokary okuw mekdebiniň rektorynyň adyna ýa-da ylmy edaranyň ýolbaşçysynyň adyna ýazylan arza;
- ýokary bilimi hakynda diplomynyň nusgasy (daşary ýurtlarda okanlara ykrar şahadatnamasynyň nusgasy);
- işgärleri hasaba almak boýunça şahsy kagyz;
- № 086/h görnüşli lukmançylyk güwänamasy;
- 4x6 sm ölçegdäki 3 sany fotosurat;
- neşir edilen ylmy işleriniň sanawy, eger-de okuwa girýäniň ylmy işleri boýunça oýlap tapyşlary bar bolsa, ylmy-barlag işleriniň we oýlap tapyşlarynyň, hasabatlarynyň sanawy;
- hünärine laýyklykda saýlap alan temasy boýunça ylmy referat;
- zähmet depderçesiniň nusgasy.
Doktorantura kabul edilmek üçin tabşyrmaly resminamalaryň sanawy:
- doktorantura döredilen edaranyň ýolbaşçysynyň adyna ýazylan arza;
- işgärleri hasaba almak boýunça şahsy kagyz;
- terjimehal;
- № 086/h görnüşli lukmançylyk güwänamasy;
- 4x6 sm ölçegdäki 3 sany fotosurat;
- ylymlaryň kandidaty diplomynyň nusgasy;
- zähmet depderçesiniň nusgasy;
- neşir edilen ylmy işleriniň, oýlap tapyşlarynyň, patentleriniň sanawy we nusgalary, ýerine ýetiren ylmy barlaglary hem-de işläp taýýarlamalary hakyndaky hasabatlarynyň sanawy;
- üç ýylyň dowamynda tamamlamak göz öňünde tutulýan doktorlyk dissertasiýasyny taýýarlamagyň meýilnamasy;
- dissertasiýanyň ugry boýunça ylmy barlaglary alyp barýan ýokary okuw mekdebiniň ýa-da ylmy edaranyň Alymlar geňeşiniň doktorlyk dissertasiýasynyň 2/3 böleginiň taýýardygy hakyndaky güwänamasy;
- disertasiýanyň temasynyň ylmy ugry boýunça ylmy barlaglary alyp barýan ýokary okuw mekdebiniň ýa-da ylmy edaranyň Alymlar geňeşiniň hödürnamasy;
- dissertasiýanyň temasynyň ylmy ugry boýunça ylmy barlaglary geçirýän iki sany ylymlaryň doktorynyň syny, olarda temanyň ylmy esaslandyrmasyna we derwaýyslygyna hem-de dissertasiýany taýýarlamagyň hödürlenýän meýilnamasyna baha berilmelidir, şeýle-de üç ýylyň dowamynda ony ýerine ýetirmegiň mümkinçiligi görkezilmelidir.
Ylymlaryň kandidaty alymlyk derejesine dalaşgäriň ýokary okuw mekdebine ýa-da ylmy edara berkidilmegi üçin şulary tabşyrýar:
- ýokary okuw mekdebiniň rektorynyň adyna ýa-da ylmy edaranyň ýolbaşçysynyň adyna ýazylan arza;
- hünärine laýyklykda saýlap alan temasy boýunça ylmy referaty;
- ýokary bilimi hakynda diplomynyň nusgasy (daşary ýurtlarda okanlara ykrar şahadatnamasynyň nusgasy).
Ylymlaryň doktory alymlyk derejesine dalaşgär ýokary okuw mekdebinde ýa-da ylmy edarada hasaba alynmagy üçin ýolbaşçynyň adyna:
- ylymlaryň kandidaty diplomynyň nusgasy goşulan arzasyny;
- dissertasiýanyň ugry boýunça ylmy işleri alyp barýan ýokary okuw mekdebiniň ýa-da ylmy edaranyň Alymlar geňeşiniň dissertasiýanyň 2/3 böleginiň taýýardygy baradaky güwänamasyny tabşyrmalydyr.
Aspirantura, doktorantura kabul edilmek üçin arzalar 1 – 28-nji fewral aralygynda kabul edilýär. Aspirantlar üçin giriş synaglary we doktorantura üçin dalaşgärleri hasaba almak çäreleri 1 – 25-nji mart aralygynda dowam edýär. Aspirantura we doktorantura hem-de alymlyk derejesine dalaşgärleriň synaglary 1-nji aprelden başlanýar.
ORIENT news
