Özbegistan we Türkmenistan halkara ýük daşalşy boýunça ýygymlary we tölegleri ýeňilleşdirýär
Özbegistan we Türkmenistan halkara ýük daşamak boýunça ýygymlary we tölegleri optimizirlemek isleýär diýip, Özbegistan Respublikasynyň Ulag ministrliginiň metbugat gullugy habar berýär.
10-njy ýanwarda iki ýurduň bilermenler toparynyň wekilleri, Türkmenistanyň we Özbegistanyň ýük daşaýjylaryndan halkara ýol ulag gatnawlary üçin alynýan ýygymlar we tölegler meselesini ara alyp maslahatlaşdylar.
Wideoaragatnaşyk arkaly geçirilen maslahatda taraplar Özbegistan Respublikasynyň we Türkmenistanyň çäginden halkara ýük daşalşyna gatnaşyjylara wiza almak proseduralaryny ýönekeýleşdirmek üçin hökümetara şertnamasynyň taslamasyna gol çekmegi çaltlaşdyrmak barada ylalaşdylar.
Mundan başga-da, Türkmenistan Özbegistanyň rugsatnamalaryny hakyky wagtynda onlaýn alyş-çalyş etmegi üpjün edýän “E-permit” ulgamyna geçmek tejribesini öwrenmäge hem gyzyklanma bildirdi.
Geçen ýylyň iýun aýynda Özbegistan we Türkmenistan sanly ýük ulag ulgamyny (e-TIR) işe girizdi. Hususan-da, bu ýurtlaryň arasyndaky harytlary resmileşdirmek işini gowulandyrmaga we onuň wagtyny gysgaltmaga mümkinçilik berdi.
Duşuşykda ara alnyp maslahatlaşmalaryň dowamynda taraplar, geljekde durmuşa geçirilmeli meseleleri hem kesgitlediler.
ORIENT news
