Özbegistanda Watan goragçylarynyň güni bellendi
Özbegistanda Watan goragçlarynyň güni bellendi. 32 ýyl mundan ozal, ýagny 1992-nji ýylyň 14-nji ýanwarynda Respublikanyň Ýaragly güýçleri döredilipdi. Häzirki wagtda köp sanly bilermenleriň pikirine görä, ýurduň Ýaragly güýçleri sebitde iň kuwwatly goşunlaryň biri hasaplanýar.
Özbegistanyň Prezidenti Şawkat Mirziýoýewiň bellemegine görä, döwlet halkyň ogullarynyň edermenligine hormat goýýar, Watanyny goramak üçin gurban bolan gahrymanlar ýatlanylýar we sarpalanýar. Gahrymanlaryň şöhratly atlary, edermenlikleri adamlaryň ýüreginde ebedi ýaşaýar we olar halkyň kalbynda hiç-wagt ölmez-ýitmezdir.
Döwlet Baştutany ýurduň harby-watançylyk terbiýesine aýratyn üns berilýändigini, şeýle hem Özbegistanyň çäk bitewiligini we döwlet howpsuzlygyny goraýan harby işgärler, weteranlar hem-de harby gullukçylar üçin mynasyp durmuş üpjünçilik şertlerini döredýändigini aýtdy.
Özbegistanyň Harby doktrinasy edil Türkmenistanyňky ýaly berk goranyş häsiýetlidir. Bar bolan harby kuwwatlyklar ýurduň milli bähbitlerini goramaga gönükdirilendir.
Watan goragçylarynyň güni Türkmenistanda her ýylyň 27-nji ýanwarynda bellenip geçilýär. Şu ýylyň 27-nji ýanwarynda ýurduň Ýaragly güýçleriniň döredilmegine 32 ýyl dolýar.
ORIENT news
