2023-nji ýylda TNGIZT-de nebitiň 4,5 million tonnadan gowragy gaýtadan işlenildi
Türkmenistanyň ykdysadyýetiniň binýatlaýyn esasyny emele getirýän nebitgaz pudagy eksport mümkinçiliklerini ýokarlandyrýar.
Bu işe “Türkmennebit” döwlet konserniniň Türkmenbaşydaky nebiti gaýtadan işleýän zawodlar toplumy (TNGIZT) hem mynasyp goşandyny goşýar.
Bu zawodlar toplumynda häzirki zaman tehnologik enjamlarda nebiti gaýtadan işlemek arkaly benzin we dizel ýangyjy, çalgy ýaglary, polipropilen, suwuklandyrylan gaz we halkara standartlaryna laýyk gelýän başga-da köp sanly ýokary hilli nebithimiýa önümleri öndürilýär.
2023-nji ýylda zawodlar toplumynda 4 504 557 tonna “gara altyn” gaýtadan işlenilip, 1 395 602 tonna benzin, 428 867 tonna kerosin, 1 390 095 tonna dizel ýangyjy, 63 563 tonna polipropilen, 102 923 tonna suwuklandyrylan gaz hem-de 57 000 tonna çalgy ýagy öndürildi.
Zawodyň infrastrukturasy gaz turbinaly elektrik bekedini, deňiz suwuny süýjediji enjamlary, bug generatorlaryny, ulanyşdan soňky suwlary sowadyjylary, nasos beketlerini, goşmaça duralgalary, elektrik stansiýalary we beýleki kömekçi desgalary özünde jemleýär.
Türkmenbaşydaky nebiti gaýtadan işleýän zawodlar toplumynda öndürilýän ýokary hilli nebit önümleri Ýewropa, Aziýa we Ýakyn Gündogar ýurtlaryna eksport edilýär.
ORIENT news
