Aşgabat we Duşanbe iki ýurduň arasyndaky söwda dolanyşygyny artdyrmak üçin mümkinçiliklere seredýär
Aşgabatda türkmen-täjik gatnaşyklarynyň ýagdaýy ara alnyp maslahatlaşyldy. 9-njy ýanwarda Täjigistanyň Adatdan daşary we Doly ygtyýarly ilçisi Wafo Niýatbekzoda bilen Türkmenistanyň daşary işler ministriniň orunbasary Ahmet Gurbanowyň arasynda duşuşyk geçirildi.
Bu duşuşygyň esasy temasy, Prezident Serdar Berdimuhamedowyň 2023-nji ýylyň maý aýynda Duşanbe şäherine amala aşyran döwlet sapary wagtynda gazanylan ylalaşyklary we geçen ýylyň noýabr aýynda Täjigistanyň paýtagtynda geçirilen söwda, ykdysady, ylmy-tehniki hyzmatdaşlyk boýunça Hökümetara toparynyň mejlisiniň kararlaryny öňe sürmek barada boldy.
Diplomatlar söwda-ykdysady hyzmatdaşlyga ünsi jemlediler we iki ýurduň arasynda söwda dolanyşygyny ýokarlandyrmagyň mümkinçiliklerini bellediler.
Medeni-ynsanperwer gatnaşyklaryň ösüşi barada aýdylanda bolsa, Medeniýet günlerini geçirmek tejribesini dowam etdirmegiň zerurlygy hem bellendi.
Türkmenistanyň Daşary işler ministrliginiň metbugat beýanatynda habar berlişine görä, parlamentleriň arasynda mundan beýläkki hyzmatdaşlygyň we parlament wekiliýetleriniň saparlarynyň alyş-çalşygynyň geljegi barada-da pikir alşyldy.
ORIENT news
