Dubaýda Milliard yzarlaýjylaryň sammiti başlandy
Çarşenbe güni, 10-njy ýanwarda Dubaýyň “Emirates towers” toplumyny Döredijileriň arenasynda (“Creators arena”) ikinji milliard yzarlaýjylar sammiti öz işine başlady. Dünýäniň dürli künjeklerinden 7000 töweregi inflýuenserleri (täsir edijiler) we kontent-meýkerleri (mazmun döredijiler - bu blog ýazmakdan, wideo döretmekden podkastlary ýerleşdirmekden we sosial mediany dolandyrmakdan başlap hemme zady öz içine alýar) bir ýere jemleýän sanly mazmun döredijileriniň Bütindünýä konwensiýasy, 11-nji ýanwara çenli ýene bir gün, “Emirates towers”-da we “Geljek” muzeýinde geçiriljek çäreler bilen dowam eder.
Açylyş dabarasyna BAE-niň hökümet wekilleri we halkara pikir liderleri gatnaşdy, bu sanly mazmuny döretmek dünýäsinde möhüm pursady alamatlandyrdy. Umuman alanyňda, sammitde 95 ýurtdan 200-e golaý bilermeniň gatnaşmagynda ýüzlerçe çäreler we 24 panel çekişmeleri meýilleşdirilendir. Sosial medianyň liderleriniň hatarynda çykyş edenler döredijilik pudagynda, sanly metbugatda, işewürlikde, maliýe we maýa goýumlarynda soňky tendensiýalary, kynçylyklary we mümkinçilikleri ara alyp maslahatlaşarlar.
Täze mediýa akademiýasy (New Media Academy) tarapyndan gurnalan sammit, innowasiýa höwesjeňleriniň tejribe paýlaşyp we media mazmuny döretmek üçin iň täze gurallar barada çekişmelere gatnaşyp biljek platformany döretmegi maksat edinýär. Maslahatyň ikinji güni, sosial mediýa döwründe hökümetiň gatnaşygyny artdyrmak, 50 million dollarlyk “YouTube” biznesi we köp sanly yzarlaýjylaryň strategiýasy barada çekişmeleri öz içine alýar.
ORIENT news
