Hindistanyň Döwlet nebit we gaz korporasiýasy çuň suwlarda nebit gazyp almaga başlady
Hindistanyň Döwlet nebit we gaz korporasiýasy (ONGC) ýurduň gündogar kenarýakasyndaky Krişna Godawari basseýniniň çuň suwlaryndan nebit gazyp almak işine üstünlikli girişdi. Bu barada sebitiň iň iri habarlar agentligi bolan “Asian News International” (ANI) habar berýär.
Premýer-ministr Narendra Modi muny Hindistanyň energetika pudagynda uly ädim we ýurduň ykdysadyýeti üçin ähmiýetli waka diýip atlandyrdy.
Korporasiýada bellenişi ýaly, “98/2” taslamasynyň durmuşa geçirilmegi nebit önümçiliginiň umumy mukdaryny 11%, gaz önümçiligini 15% ýokarlandyrmaga kömek eder.
“ONGC” korporasiýasy taslamanyň birinji tapgyryny 2020-nji ýylyň mart aýynda durmuşa geçirdi. Şonda “KG-DWN-98/2” blogynyň “U” meýdançasynda 10 aýyň içinde rekord derejede gaz çykaryldy. Ýekşenbe güni ilkinji nebit önümçiliginiň başlanmagy bilen Hindistanyň döwlet nebit we gaz korporasiýasy taslamanyň ikinji tapgyryny tamamlamaga golaýlaýar.
Döwlet korporasiýasynyň ilkinji bolup “turbanyň içindäki turba” innowasion tehnologiýasyny ulanandygy bellärliklidir. Önümçilik işleriniň köpüsi Hindistanyň Kattupalli şäherindäki modul önümleri öndürýän kärhanada geçirildi.
Blokdaky galan gaz we nebit ýataklary 2024-nji ýylyň ortalarynda ulanmaga bermek göz öňünde tutulýar.
ORIENT news
