Türkmenistana bir aýyň içinde iki "Boeing" uçary getirildi
Türkmenistan raýat awiasiýasyny ösdürmek bilen bagly 2030-njy ýyla çenli kabul eden milli maksatnamasyna laýyklykda bu pudagy yzygiderli döwrebaplaşdyrýar. Türkmenistanyň awiasiýa parkyna raýat gatnawlaryna niýetlenen "Boeing 777-300" kysymly uçaryň nobatdakysy gelip gowuşdy. Bu barada "Türkmenhowaýollary" agentligi habar berýär.
Bu Türkmenistanyň Prezidentiniň gol çeken Karary esasynda soňky bir aýda Türkmenistana getirilen uçarlaryň ikinjisidir. Şeýle ýolagçy uçaryň ilkinjisi geçen ýylyň 4-nji dekabrynda Aşgabadyň Halkara howa menziline gonupdy.
Bi wagtda 368 ýolagça niýetlenen bu uçar özüniň ýokary amatlylygy we rahatlygy bilen tapawutlanýar. Uçaryň umumy orun sanynyň 40-sy biznes, 32-si premium-ekonom, 296-sy bolsa ekonom klaslara degişlidir.
"Boeing 777-300" kysymly uçaryň "GE90-115BL2" görnüşli iki hereketlendirijisi bolup, ol gonmasyz şol bir wagtda 40 tonna ýük goşlaryny almak bilen birlikde 11 müň 390 kilometri geçip bilýär.
ORIENT news
