TDG medeni hyzmatdaşlykda Türkmenistanyň tagallalaryna ýokary baha berýär
Türki Döwletleriň Guramasynyň (TDG) Baş sekretary Kubanyçbek Omuraliýew Täze ýyl mynasybetli Prezident Serdar Berdimuhamedowa iberen gutlag hatynda medeni gatnaşyklary giňeltmekde Türkmenistanyň döwlet Baştutanynyň tagallalaryna ýokary baha berýändigini belledi. Bu barada Türkmenistanyň Döwlet habarlar agentligi mälim edýär.
“Türki Döwletleriň Guramasy Siziň sebit hyzmatdaşlygyny ösdürmek, türki dünýäniň çäklerinde ykdysady ösüşi gazanmak we medeni gatnaşyklary giňeltmek boýunça tagallalaryňyza, türki döwletleriň arasynda hyzmatdaşlygy pugtalandyrmaga ygrarlylygyňyza ýokary baha berýär” diýlip, hatda bellenýär.
Omuraliýew pursatdan peýdalanyp, şeýle hem Türkmenistanyň doganlyk halkyna parahatçylyk we abadançylyk arzuw etdi.
Ýeri gelende bellesek, TÜRKSOÝ-yň çözgüdi esasynda Änew şäheri şu ýyl Türki dünýäniň medeni paýtagtydyr.
ORIENT news
