52 ýyllyk hökümdarlykdan soň, Daniýanyň şa zenany tagtyny ogluna geçirýär
Daniýanyň şa zenany Margaret II 2024-nji ýylyň ýanwar aýynda tagtdan aýrylar. Bu barada Daniýanyň patyşalyk neberesiniň resmi web-saýty habar berýär.
“Şu ýylyň fewral aýynda arkama uly operasiýasyny geçirdim. Maňa ideg eden lukmanlaryň başarnyklary netijesinde, hemme zat üstünlikli boldy. Şeýle-de bolsa, operasiýa gelejek hakda oýlanmaga esas berdi - jogapkärçiligi indiki nesle geçirmegiň wagty geldi. 2024-nji ýylyň 14-nji ýanwarynda eziz kakamyň ornuna geçen pursadymdan 52 ýyl geçensoň, tagty oglum, şazada Frederikiň eline bererin" diýip, şa zenany mälim etdi.
Şa aýal häzirki wagtda 83 ýaşynda. Margaret II 1972-nji ýylyň 14-nji ýanwarynda tagta çykdy. Şeýlelik bilen, onuň hökümdarlygy göni 52 ýyl dowam eder.
Mirasdüşer şazada Frederik 1968-nji ýylyň 26-njy maýynda dünýä indi. Ol 1993-nji ýylda Garward uniwersitetini (ABŞ) tamamlady we 1995-nji ýylda Orhus uniwersitetinden syýasy ylymlaryň doktory derejesini aldy. Tagtyň mirasdüşeri Daniýanyň goşunynda, deňiz güýçlerinde we howa güýçlerinde gulluk edip, ol ýaragly güýçleriň ähli bölümleriniň serkerdesidir. Birnäçe halkara baýraklaryň eýesi bolan mirasdüşer şazadanyň 4 çagasy bar.
ORIENT news
