Ilkinji türk kosmonawty Arş giňişligine 17-nji ýanwarda uçar
Türkiýe Respublikasynyň senagat we tehnologiýa ministri Fatih Kajyr ilkinji türk kosmonawty Alper Gezerawjiniň Arş giňişligine uçuşynyň biraz yza, ýagny, 17-nji ýanwara süýşürilendigini mälim etdi. Bu barada "TASS" habarlar agentligi habar berýär.
“Uçuş 2024-nji ýylyň 17-nji ýanwarynda amala aşyrylar. Bu uçuşyň 9-njy ýanwarda meýilleşdirilendigini ozal habar berdik. Ýöne “SpaceX” kompaniýasynyň biziň uçuşymyzdan ozal Arş giňişligine uçuşy meýilleşdirendigi sebäpli, kosmonawtymyzyň gidýän senesini 7-8 gün yza süýşürmeli bolduk. Bu uçuşyň häzirki wagtda bellenen senesi 17-nji ýanwardyr" diýip, ol aýtdy.
Kajyr Arş giňişligine uçuşyň dowamynda birnäçe ylmy barlaglaryň we gözegçilikleriň geçirilmeginiň meýilleşdirilendigini aýtdy. Türkiýäniň bu uçuşa ýurduň tehnologiki ösüşinde täze tapgyryň başlangyjy hökmünde uly umyt baglaýandygyny aýtdy.
Arş giňişligine ilkinji bolup syýahat etjek türkiýeli Gezerawji munuň üçin karantini we okuwlary geçdi. Ol hemme zadyň meýilnama boýunça we kynçylyksyz gidýändigine garamazdan, öňdäki uçuşyň tutuş ýurt üçin ähmiýetlidigini göz öňünde tutup, onuň örän tolgundyryjydygyny aýtdy.
Türk kosmonawty “Axiom 3” Arş gämisinde Jon Kennedi adyndaky kosmos merkezinden Halkara kosmos stansiýasyna syýahat etjek toparyň bir agzasydyr. Ol bu syýahata Ispaniýadan, Italiýadan we Şwesiýadan gelen kärdeşleri bilen ýola düşer.
2023-nji ýylyň aprelinde Türkiýäniň Prezidenti Rejep Taýyp Ärdogan Arş giňişligindäki Halkara kosmos stansiýasyna uçmak üçin iki dalaşgäri halka hödürledi. Munuň netijesinde, Respublikan howa güýçleriniň uçarmany Gezerawji bilen bilelikde, "Roketsan" kompaniýasynda inžener bolup işleýän Tuwa Jihangir Atasewer Arş giňişligine taýýarlyk gördi. Geljekki kosmonawtlar türk kosmos maksatnamasynyň hünärmenleri, Respublikan ylmy-barlag institutlary we ABŞ-nyň “Axiom Space” kompaniýasynyň hünärmenleri tarapyndan jemi 36 müň dalaşgäriň arasyndan saýlanyp alyndy.
2021-nji ýylda Türkiýäniň Prezidenti kosmonawtlary taýýarlamak we ýurduň özbaşdak Arş gämisini Aýa ibermek ýaly milli kosmos maksatnamasyna badalga berilýändigini yglan etdi. Bu maksatnamanyň bahasy 6 milliard dollartöweregi bolar. Aý Maksatnamasynyň çäklerinde Arş gämisini Ýeriň ýeketäk hemrasynyň üstünde üstünlikli gondurmagyň üstünde iş alnyp barylýar.
ORIENT news
