Türkmenistan we BMG-niň Ösüş maksatnamasy şu ýyl 70 million dollarlyk taslamalara gol çekdiler
Birleşen Milletler Guramasynyň Ösüş maksatnamasynyň Türkmenistandaky hemişelik wekili Narine Saakýan şu ýyl Türkmenistan bilen bu guramanyň arasynda umumy bahasy 70 million ABŞ dollaryna barabar taslamalara gol çekilendigini aýtdy. Bu barada onuň türkmen metbugatynda çap edilen makalasynda mälim edilýär.
Bu taslamalar jemgyýetçilik saglygy goraýyşyň milli ulgamynyň mümkinçiliklerini artdyrmagy we ilatyň ýokary hilli lukmançylyk hyzmatlaryna elýeterliligini üpjün etmäge gönükdirilendir. Bellenişi ýaly, BMG-niň Ösüş maksatnamasy Türkmenistan bilen diňe bir öňdebaryjy önüm öndürijilerden ýokary hilli lukmançylyk enjamlary satyn almakda hyzmatdaşlyk etmän, eýsem ýurtda ýokanç we ýokanç däl keselleriň ýaýramagyna gözegçilik etmekde hem ýardam edýär.
Narine Saakýanyň bellemegine görä, Türkmenistan we BMG-niň Ösüş maksatnamasy statistika, bank we maliýe, gümrük, raýat ýagdaýlarynyň namalary ulgamlary boýunça birnäçe taslamalary durmuşa geçirdiler. Bu işler "Türkmenaragatnaşyk" agentligi bilen has çuň hyzmatdaşlygyň binýadyny goýmaga şert döretdi.
BMG-niň Ösüş maksatnamasy şeýle hem gender deňligi, zenanlaryň ykdysady mümkinçiliklerini artdyrmaga, olaryň telekeçilik, innowasiýa we sanlylaşdyrmak işine işjeň gatnaşmaklaryny üpjün etmekde hyzmatdaşlygy giňeltmegi meýilleşdirýär.
ORIENT news
