“Mançester Siti” futbol boýunça klublaryň arasyndaky dünýä çempionatynda ilkinji gezek ýeňiji boldy
Angliýanyň “Mançester Siti” kluby futbol boýunça klublaryň arasyndaky dünýä çempionatynda ilkinji gezek ýeňiji boldy.
20-nji dünýä ýaryşynyň final oýnunda Hosep Gwardiolanyň topary Braziliýanyň “Fluminense” toparyny 4:0 hasaby bilen ýeňdi. Oýun Saud Arabystanynyň Jidde şäherindäki King Abdullah Sports Сity stadionynda geçdi.
Oýnuň eýýäm birinji minutynda hüjümçi Hulian Alwares topy garşydaşynyň derwezesine salmagy başardy, 27-nji minutda bolsa “Fluminenseniň” goragçysy Mota Filýo topy öz derwezesine saldy. Oýnuň ikinji ýarymynda “Mançester Sitiniň” ýarym goragçysy Fil Foden üçünji goly salmagy başardy, 89-njy minutda bolsa ýene-de Alwares dördünji goly garşydaşynyň derwezesine iberdi.
Şeýlelikde, Angliýanyň futbol klubunyň baş tälimçi Hosep Gwardiola futbol boýunça klublaryň arasynda dünýä çempionatynda dört gezek ýeňiji bolan ilkinji tälimçi boldy. Ol üç gezek ýeňiji bolan italiýaly Karlo Ançelottiden öňe saýlandy.
2023-nji ýylda “Mançester Siti” şeýle hem Angliýanyň çempionatynda, Angliýanyň Kubogynda, Çempionlar ligasynda we UEFA-nyň Superkubogynda ýeňiji boldy.
12-22-nji dekabrda Saud Arabystanynda geçen ýaryşa kontinental klub ýaryşlarynyň ýeňijileri gatnaşdylar. Bu ýaryşyň ozalky çempiony Ispaniýanyň “Real Madrid” topary.
ORIENT news
