Türkmenistanyň Mejlisi “Energiýany tygşytlamak we energiýadan netijeli peýdalanmak hakynda” Kanunyň taslamasyny taýýarlaýar
Türkmenistanyň Mejlisiniň Başlygy Dünýägözel Gulmanowa anna güni geçirilen Hökümet mejlisinde ýurduň parlamentiniň kanun çykaryjylyk işi barada maglumat berdi. Onuň mälim etmegine görä, beýleki hukuk namalary bilen bir hatarda, Raýat kodeksiniň täze beýanynyň, “Gidrometeorologiýa işi hakynda”, “Energiýany tygşytlamak we energiýadan netijeli peýdalanmak hakynda” Türkmenistanyň Kanunlarynyň taslamalaryny taýýarlamak işleri alnyp barylýar. Bu barada Türkmenistanyň Döwlet telewideniýesi habar berýär.
Mundan bir aý öň, energiýany tygşytlamak we netijeli peýdalanmak barada degişli kanunçylyk namasynyň taýýarlanyşy barada Türkmenistanyň Ministrler Kabinetiniň Başlygynyň elektroenergetika we gurluşyk toplumyna gözegçilik edýän orunbasary Baýmyrat Annamämmedow hasabat beripdi. Onuň sözlerine görä, täze Kanunyň taslamasy energiýany tygşytlamak we onuň ulanylyşynyň netijeliligini artdyrmak boýunça hukuk, ykdysady we guramaçylyk binýady üpjün eder.
ORIENT news
