Türkmenistanyň ýolbaşçylary Azerbaýjanyň Prezidentini doglan güni bilen gutladylar
Türkmenistanyň Prezidenti Serdar Berdimuhamedow Azerbaýjan Respublikasynyň Prezidenti Ilham Aliýewe doglan güni mynasybetli gutlag hatyny iberdi. Ol Azerbaýjanyň döwlet Baştutanynyň resmi web-saýtynda köpçülige ýetirildi.
Prezident Serdar Berdimuhamedow hatynda Türkmenistan bilen Azerbaýjan Respublikasynyň arasyndaky uzakdan gaýdýan çuňňur dostluk gatnaşyklaryň okgunly ösmegini dowam etdirjekdigine hem-de ýurtlarymyza we halklarymyza bähbitleri getirjekdigine ynam bildirdi.
"Şu ýakymly mümkinçilikden peýdalanyp, hormatly Ilham Geýdar ogly, Size berk jan saglyk, bagt we maşgala abadançylygyny, Azerbaýjanyň doganlyk halkyna bolsa, parahatçylyk, mundan beýläk-de gülläp ösmegi tüýs ýürekden arzuw edýärin" diýlip, hatda bellenýär.
Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow hem Ilham Aliýewi doglan güni bilen gutlady.
"Türkmenistan bilen Azerbaýjan Respublikasynyň arasynda ikitaraplaýyn gatnaşyklaryň pugtalandyrylmagyna we ösdürilmegine berýän aýratyn ünsüňiz we uly goşandyňyz üçin Size minnetdarlyk bildirmek isleýärin" diýip, Gurbanguly Berdimuhamedow gutlag hatynda belledi.
ORIENT news
