Türkmenistan we Dagystan parom gatnawlaryny ýola goýmagyň üstünde işleýärler
Türkmenistan we Russiýa Federasiýasynyň Dagystan Respublikasy degişli port düzümleriniň arasynda ilkinji ýük gämisini gatnatmagyň üstünde çäreleri alyp barýarlar. Bu barada “Mahaçkala deňiz söwda porty” paýdarlar jemgyýetine salgylanyp “Media Paluba” neşiri habar berýär.
“Teklip edilişi ýaly, bu ugur boýunça ilkinji ýükli gatnaw şu ýylyň ahyryna çenli işe giriziler. Biz zerur bolan ýük esaslary we port infrastrukturasyny döretmek üçin Türkmenistandaky hyzmatdaşlarymyzdan ilkinji gäminiň görnüşi, durjak ýeri barada maglumatlara garaşýarys” diýip, portuň direktorynyň orunbasary Haji-Murad Abaşilow nygtaýar.
Mahaçkala bilen Türkmenbaşy portlarynyň arasynda gatnaşyk gurmak söwda dolanyşygyny ýokarlandyrmak şertlerinde diňe bir sebitara däl-de, eýsem döwletara söwda dolanyşygyny ýokarlandyrmaga hem ýardam eder. Soňky ýyllarda Türkmenistan we Russiýa ulag aragatnaşygyny ösdürmek boýunça gepleşikleri işjeň geçirýärler.
ORIENT news
