Türkmen elektrik energiýasy owgan paýtagtyna çenli baryp ýeter
Owgan hökümetiniň Başlygynyň orunbasary Abdul Gani Baradar türkmen elektrik energiýasyny Owganystanyň demirgazyk sebitlerine – Jauzjana, Baglana we soňra Kabul şäherine eksport etmegi üpjün etjek taslama badalga berdi. Bu barada “TOLO” habarlar agentligi mälim edýär.
Bellenişi ýaly, taslamanyň durmuşa geçirilmegi bilen 500 kilowolt togy ibermäge we ýüzlerçe hojalygy elektrik energiýasy bilen bökdençsiz üpjün etmäge şert dörär. Taslama elektrik energiýasyny Kabulyň üsti bilen ýurduň günorta sebitlerine hem ibermäge mümkinçilik berer.
Owgan hökümetiniň agzasynyň sözlerine görä, türkmen elektrik energiýasynyň eksporty ýurduň energetika mümkinçiliklerini artdyryp, energiýa serişdelerini dünýä bazarlaryna çykarmakda hyzmatdaşlar üçin täze gözýetimleri açýar.
Häzirki wagtda Türkmenistan Owganystan bilen energetika howpsuzlygyny üpjün etmäge we Günorta Aziýa sebitine täze bazarlary açmaga gönükdirilen birnäçe iri energetika taslamalaryny durmuşa geçirýär.
ORIENT news
