Emeli intellektiň ýazan ylmy-fantastiki hekaýasy edebi eserleriň bäsleşiginde ýeňiji boldy
Pekin şäherinde ýerleşýän Sinhua uniwersitetiniň professory Şen Ýanyň emeli intellekti ulanyp ýazan ylmy-fantastiki nowellasy Hytaýyň ylmy-fantastiki eserler boýunça milli baýragyna mynasyp boldy. Onuň bu eseri metagiňişlik we ynsansypat robotlar baradadyr. Döredijilik bäsleşigi ýurduň Sýansu şäherinde Fantastiki ýazyjylaryň birleşmesi tarapyndan guraldy.
“Ýatlamalar ýurdy” diýlip atlandyrylýan ylmy-fantastiki hekaýa hytaý dilinde ýazylyp, 6 müň iýeroglifden ybaratdyr. Awtor täze eseri garalama ýazylan 43 müň iýeroglifiň we 66 görkezmäniň üsti bilen bary-ýogy 3 sagadyň içinde döredipdir.
“Ýatlamalar ýurdy” diýlip atalandyrylýan eserde beýan edilişi ýaly, adamlara aralaşmak gadagan edilen patyşalykda ýadyny we geçmişini unudan ynsansypat robotlaryň we emeli intellektiň döreden geň durmuşy höküm sürýär. Düzgüni bozan islendik adam ýa-da emeli döredilen serişde ýadyndan mahrum edilýär we hemişelik gadaganlygyň içinde galmaly bolýar. Eseriň baş gahrymany bolup, hakyky durmuşda neýroinžener bolup işlän, metagiňişligiň ylmy barlagçysy Li Sýao atly adam çykyş edýär. Ylmy tejribe geçirip durka, tötänleýin maşgalasy barada ähl ýatlamalary ýitiren baş gahryman Ýatlamalar ýurdy baradaky rowaýatlar bilen gyzyklanyp başlaýar hem-de metagiňişlikde ýitirilen ýady dikeldip biljekdigine umyt edýär.
Bäsleşige gelp gowşan eserlere baha berýän eminleriň diňe biri Şeniň bu eseri döredende emeli intellekti peýdalanandygy barada habarly bolupdyr.
“Onlarça görkezmäni salgy berenimizden soň, emeli intellekt eseriň hem-de ony ýazanyň adyndan başlap, ýazgyny dürli şekiller bilen bezemäge çenli ähli mazmuny döretdi” diýip, professor Şen Ýan nygtaýar.
Hekaýanyň mazmunyna görä suratlar hem emeli intellekt tarapyndan döredilipdir.
ORIENT news
