Türkmenistanyň Tennis federasiýasynyň ýolbaşçysy Aziýa Tennis federasiýasynyň wise-prezidentligine saýlanyldy
Türkmenistanyň Tennis federasiýasynyň ýolbaşçysy Eziz Döwletow 2027-nji ýyla çenli Aziýa Tennis federasiýasynyň wise-prezidentligine saýlanyldy.
Türkmen sporty üçin bu hoş habar Tailandyň paýtagty Bangkok şäherinden gelip gowuşdy. Bu ýerde Aziýa Tennis federasiýasynyň mejlisi boldy. Şeýlelikde, Eziz Döwletow Aziýa Tennis federasiýasynyň direktorlar geňeşiniň düzümine girdi.
Türkmenistanyň wekili üçin 53 delegatdan 41-si ses berdi.
Guramanyň täze ýolbaşçysy Eziz Döwletowy wise-prezident wezipesine belläninde onuň guramaçylyk ukyplaryny we tennisçi hökmündäki tejribesini göz öňünde tutdy.
Şeýle hem Aziýa Tennis federasiýasynyň mejlisinde Eziz Döwletowy 2024-2025-nji ýyllar üçin Halkara tennis federasiýasynyň Masters ýaryşlaryny geçirmek boýunça komitetine saýlamak barada çözgüt kabul edildi. Bu komitet abraýly ýaryşlary geçirmek boýunça jogapkärli gurama bolup durýar.
33 ýaşly Eziz Döwletow sport ussady, Aziýa we Okeaniýa sebitleriniň dördünji toparynyň Dewis Kubogynyň, halkara we milli ýaryşlaryň ýeňijisi.
2018-nji ýyldan 2021-nji ýyla çenli ol Türkmenistanyň Tennis federasynyň baş sekretary, 2021-nji ýyldan 2022-nji ýylyň ortalaryna çenli wise-başlygy. 2022-nji ýylyň iýul aýynda ol bu sport düzüminiň ýolbaşçysy boldy.
ORIENT news
