Türkmenistan we ÝB adam hukuklary boýunça özara gatnaşyklary ara alyp maslahatlaşdylar
18-nji dekabrda Belgiýanyň paýtagtynda Türkmenistan bilen Ýewropa Bileleşiginiň wekilleriniň arasynda gepleşikler geçirildi. Onuň gün tertibi adam hukuklary ulgamyndaky hyzmatdaşlyk barada pikir alyşmak boldy.
Türkmenistanyň Döwlet, hukuk we demokratiýa institutynyň direktory Ýagmyr Nuryýewiň ýolbaşçylygyndaky türkmen wekiliýetiniň düzüminde Adalatçy, Daşary işler, Içeri işler we Adalat ministrlikleriniň işgärleri gatnaşdylar. ÝB-niň wekiliýetine Ýewropanyň daşary aragatnaşyklar gullugynyň Merkezi Aziýa bölüminiň işgärleri, Ýewropa Komissiýasynyň Halkara Hyzmatdaşlygy boýunça Baş Müdirliginiň wekilleri we ÝB-niň Merkezi Aziýa boýunça Ýörite wekiliniň wekiliýeti girdi. Söhbetdeşlige wideoaragatnaşyk arkaly Türkmenistanyň Belgiýadaky ilçihanasynyň we ÝB-niň Türkmenistandaky wekiliýetiniň ýolbaşçylary hem goşuldy.
Duşuşykda söhbetdeşler 2021-2025-nji ýyllar aralygynda Türkmenistanda Adam Hukuklary boýunça Hereketleriň Milli meýilnamasy barada pikir alyşdylar we hukuk ulgamyny berkitmek we bu ugurda jogapkärçiligi ýokarlandyrmak meseleleri ara alnyp maslahatlaşyldy. Wekiliýetler Adalatçynyň institutynyň 2023-nji ýyldaky işini giňişleýin seljerdiler.
ORIENT news
