Müsüriň häzirki Prezidenti üçünji möhlete gaýtadan saýlandy
Müsür Arap Respublikasynyň häzirki Prezidenti Abdel Fattah as-Sisi üçünji möhlete bu ýokary döwlet wezipesine gaýtadan saýlandy. Bu barada “Euronews” habarlar agentligi mälim edýär.
Milli saýlaw toparynyň maglumatlaryna laýyklykda, Abdel Fattah as-Sisä ähli saýlawçylaryň 89,6 göterimi sesini beripdir. Ikinji ýerde iň köp ses toplan Halk-Respublika partiýasynyň ýolbaşçysy Hazem Omar ähli sesleriň 4,5 göterimini gazandy.
Saýlawçylaryň saýlawa gatnaşyk derejesi 66,8 göterime deň boldy.
Müsüriň Prezidentligine dalaşgärler hökmünde ýurduň Sosial-demokratik partiýasynyň ýolbaşçysy Farid Zahran we “Wafd” atly partiýanyň ýolbaşçysy Abdel Sanad Ýamama hem hödürlendi.
Ozal ýurduň bir ministrligine ýolbaşçylyk eden Abdel Fattah as-Sisi 2014-nji ýyldan bäri Müsüriň Prezidentidir. Ol sesleriň 97 göterimini toplap, 2018-nji ýylda bu ýokary döwlet wezipesine ikinji möhlete saýlandy.
2019-njy ýylda ýurduň Konstitusiýasyna girizilen üýtgetmeler Fattah as-Sisä Prezidentlik möhletini 4 ýyldan 6 ýyla çenli uzaltmaga şert döretdi. Şeýle hem oňa öňde boljak Prezident saýlawlaryna gatnaşmaga mümkinçilik döredildi.
ORIENT news
