Detroýtdaky täze ýol üstünde hereketlenýän ulaglary zarýadlandyrar
Amerikanyň Birleşen Ştatlarynyň Miçigan ştatynyň Detroýt şäherinde ulag serişdelerini elektrikleşdirmek boýunça möhüm ädim ädildi. Şäheriň ýol gurluşykçylary üstündäki awtoulaglara simsiz zarýad beriji täze awtomobil ýoluň gurluşygyny tamamladylar.
Şäheriň “14th Street” atly köçesinde “Electreon” tehnologiýasy esasynda induktiw zarýad beriji rulonlar ornaşdyrylyp, olar ýoluň üstünde hereket edýän elektrik ulaglara kabul ediji arkaly zarýad berýär.
Bu ýol hakyky şertlerde ýakyn birnäçe ýylyň içinde jemgyýete elýeterli etmek maksady bilen Ysraýyl döwletiniň “Electreon” kompaniýasynyň simsiz zarýad beriji tehnologiýasyny synagdan geçirmek we has-da kämilleşdirmek üçin ulanylar.
Zarýad beriji ýol elektrik ulaglaryň çäkli energiýa ätiýaçlyklarynyň meselelerini çözmäge ýol açar.
“Electreon” simsiz zarýad beriji tehnologiýa ýoluň üstünde ornaşdyrylan mis rulonlaryň we kabul edijileriň arasayndaky induktiw aragatnaşyga esaslanýar. Täze ýol magnit meýdanynyň üsti bilen energiýany kabul ediji enjam ornaşdyrylan ulag serişdesi ýoluň degişli bölegine ýakynlaşanda ony zarýadlandyrýar.
Zarýad beriji bu bölekler simsiz ulgamyň üsti bilen duran ýa-da hereketlenýän ulagyň akkumulýatoryny zarýadlandyrýar. Eletrik ýol sürüjiler, pyýadalar we hatda ýabany janly-jandarlar üçin-de howpsuzdyr. Ýoldaky her bir rulon rugsat edilen kabul edijili ulag rulonlaryň golaýyndan geçende işläp başlaýar. Bu zerur bolan ulag serişdelerine elektrik energiýasynyň geçirilmegini kepillendirýär.
“Electreon” kompaniýasy Mçiganyň merkezi stansiýasynyň öňünde awtoulaglar duran ýagdaýyndaka olara zarýad beriji iki sany elektrik bekedini hem gurnady.
“Electreon” 8 ýurtda 18 taslamany, şol sanda Ysraýylda awtobuslary hereketlendiriji, Fransiýada, Hytaýda, Norwegiýada we Şwesiýada ýollary elektrikleşdirmek işlerini amala aşyrýar. Kompaniýanyň ýolda ulaglary simsiz usulda zarýad bermek tehnologiýasy “Time Magazine” žurnaly tarapyndan 2021-nji ýylyň iň gowy 100 oýlap tapyşynyň biri diýlip yglan edildi.
ORIENT news
