Türkmenistanyň Täze ýyl baş arçasynyň yşyklary ýakyldy
Beýikligi 44 metre, ini hem 16 metre ýetýän Türkmenistanyň Täze ýyl baş arçasynyň yşyklary ýakyldy. Garaşsyz Döwletleriň Arkalaşygy giňişligindäki iň belent arça müň dürli yşyklar we bezegler bilen ýalkym saçdy. Bu barada Döwlet habarlar agentligi mälim edýär.
Täze ýyl ertekileriniň baş gahrymanlary Aýazbabanyň we Garpamygyň peýda bolmagy bilen, Aşgabadyň "Älem" medeni dynç alyş merkezinde artistleriň we çagalaryň gatnaşmagynda baýramçylyk dabarasy ýaýbaňlandyryldy. Bu ýere gelmezinden ozal, Aýazbaba we Garpamyk Arkadag şäherindäki Täze ýyl baş arçasynyň ýanynda guralan dabaralara hem gatnaşdylar.
"Körpeleriň islegi boýunça Aýazbabanyň jadyly taýagynyň kömegi bilen belent başly arçanyň yşyklarynyň ýakylmagy bu ýerde guralan dabaranyň iň täsirli pursadyna öwrüldi. Onuň yzysüre ýurdumyzyň şäherleriniň we obalarynyň meýdançalarynda gurnalan Täze ýyl arçalary dürli öwüşginli yşyklara beslendi" diýlip, habarda bellenýär.
ORIENT news
