Ykdysady howpsuzlyk boýunça iň zehinli talyplar yglan edildi
Türkmen döwlet ykdysadyýet we dolandyryş institutynda ykdysady howpsuzlyk boýunça ýokary okuw mekdepleriniň talyplarynyň arasynda geçirilen internet olimpiadada iň zehinli ýaşlar kesgitlendi. Bu barada Türkmenistanyň resmi metbugaty habar berýär.
Nyýazmuhammet Nyýazow (Türkmen döwlet ykdysadyýet we dolandyryş instituty), Begli Berdimyradow (Halkara ynsanperwer ylymlary we ösüş uniwersiteti), Aşyr Jumagulyýew (Inžener-tehniki we ulag kommunikasiýalar instituty), Keýmir Öwezow (Türkmenistanyň Telekommunikasiýalar we informatika instituty) we Bereket Şatlykow (S.A.Nyýazow adyndaky Türkmen oba hojalyk uniwersiteti) ders olimpiadasynda birinji orunlara mynasyp boldular.
Ikinji orna hem ýokarda ady agzalan ýokary okuw mekdepleri bilen birlikde, Aba Annaýew adyndaky halkara atçylyk akademiýasynyň we Türkmen döwlet maliýe institutynyň talyplary eýelediler.
Habar berlişine görä, ders olimpiadasynda çylşyrymly ýumuşlar berildi. Bu öz gezeginde ykdysady işde ýüze çykýan meseleleri netijeli çözmäge ukyply talyplary ýüze çykardy.
ORIENT news
