Türkmenistanyň daşary işler ministriniň iki orunbasary täzelendi
Duşenbe güni Hökümet we Döwlet howpsuzlyk geňeşiniň agzalarynyň, daşary ýurtlardaky diplomatik wekilhanalarynyň, konsullyk edaralarynyň we halkara guramalaryň ýanyndaky wekilhanalarynyň ýolbaşçylarynyň gatnaşmagynda geçirilen Ministrler Kabinetiniň giňişleýin mejlisinde Türkmenistanyň daşary syýasat edarasynyň birnäçe ýolbaşçylary täzelendi.
Türkmenistanyň Prezidenti Serdar Berdimuhamedow daşary işler ministriniň orunbasarlary Wepa Hajiýewi we Berdinyýaz Mätiýewi başga işe geçmekleri sebäpli wezipelerinden boşatdy.
Türkmenistanyň gol çeken Permanlary esasynda Wepa Hajiýewe Adatdan daşary we Doly ygtyýarly ilçi diýen diplomatik dereje berlip, ol Birleşen Milletler Guramasynyň Ženewadaky edarasynyň ýanyndaky (Şweýsariýa Konfederasiýasy, Ženewa şäheri) Türkmenistanyň hemişelik wekili hem-de Türkmenistanyň Şweýsariýa Konfederasiýasyndaky (Ženewa şäheri) Adatdan daşary we Doly ygtyýarly ilçisi wezipesine bellenildi.
Bu wezipelerde ozal işlän Atageldi Haljanow başga işe geçmegi sebäpli, şol bir wagtda Türkmenistanyň Birleşen Milletler Guramasynyň Naýrobidäki (Keniýa Respublikasy) edarasynyň (UNON), Birleşen Milletler Guramasynyň Daşky gurşaw boýunça maksatnamasynyň (ÝUNEP), Birleşen Milletler Guramasynyň Ilatly nokatlar boýunça maksatnamasynyň (UN-HABITAT) ýanyndaky (oturýan ýeri Ženewa şäheri) hemişelik wekili wezipelerinden boşadyldy.
Türkmenistanyň daşary işler ministriniň täze orunbasarlary wezipelerine Ahmet Gurbanow we Serdar Muhammetdurdyýew bellenildi. Ahmet Guranow mundan ozal Türkmenistanyň Eýran Yslam Respublikasyndaky (Tähran şäheri) Adatdan daşary we Doly ygtyýarly ilçisi hem-de Türkmenistanyň Ykdysady Hyzmatdaşlyk Guramasynyň ýanyndaky hemişelik wekili wezipelerinde işleýärdi.
Türkmenistanyň Prezidentiniň Karary bilen, Türkmenistanyň Prezidentiniň Diwanynyň Döwlet protokoly we halkara gatnaşyklary bölüminiň müdiri Serdar Muhammetdurdyýew, şol bir wagtda Türkmenistanyň daşary işler ministriniň orunbasary wezipesine bellenildi.
Şeýle hem Türkmenistanyň Hindistan Respublikasyndaky (Nýu-Deli şäheri) Adatdan daşary we Doly ygtyýarly ilçisi Şalar Geldynazarow şol bir wagtda Türkmenistanyň Şri Lanka Demokratik Sosialistik Respublikasyndaky Adatdan daşary we Doly ygtyýarly ilçisi wezipesine bellenildi.
ORIENT news
