Putin - Russiýa Türkmenistanyň hemişelik Bitaraplyk syýasatyna uly hormat goýýar
Türkmenistanyň Adatdan daşary we Doly ygtyýarly ilçisi Esen Aýdogdyýew duşenbe güni, 4-nji dekabrda Russiýa Federasiýasynyň Prezidenti Wladimir Putine ynanç hatyny gowşurdy.
Uly Kreml köşgüniň Aleksandr zalynda daşary ýurtlaryň täze ilçileriniň ynanç hatlaryny kabul etmek dabarasynda çykyş eden Wladimir Putin dostlukly Türkmenistan bilen köptaraplaýyn hyzmatdaşlygyň işjeň ösýändigini belledi.
Syýasy we ykdysady gatnaşyklar parlamentleriň, sebitleriň we jemgyýetiň arasyndaky giň aragatnaşyklar bilen sazlaşykly doldurylýar. Ynsanperwer ugurdaky gatnaşyklar boýunça ol, Rus-türkmen uniwersitetiniň döredilmegini we Aşgabatda Döwlet rus drama teatrynyň täze binasynyň we Puşkin adyndaky bilelikdäki orta mekdebiň goşmaça binasynyň gurluşygyny agzap geçdi. Bu barada Kremliň resmi web sahypasynda habar berildi.
Wladimir Putin: “Russiýa Türkmenistanyň hemişelik Bitaraplyk syýasatyna uly hormat goýýar. Biz köptaraplaýyn platformalarda, ilkinji nobatda GDA ýurtlarynda, Hazar “bäşligi” we “Merkezi Aziýa + Russiýa” formatlarynyň çäginde netijeli özara gatnaşyklary dowam etdirmäge taýýardyrys”-diýdi.
ORIENT news
