Benin Respublikasynyň ilçisi Türkmenistanda işe başlady
Türkmenistanyň Prezidenti Serdar Berdimuhamedowyň tabşyrygy boýunça Mejlisiň Başlygy D.Gulmanowa Benin Respublikasynyň Türkmenistandaky Adatdan daşary we Doly ygtyýarly ilçisi Akambi Andre Okunlola-Biauwdan ynanç hatyny kabul etdi. Bu barada Döwlet habarlar agentligi mälim edýär.
Akambi Andre Okunlola-Biau Benin Respublikasynyň Türkmenistan bilen hyzmatdaşlygy işjeňleşdirmäge gyzyklanma bildirýändigini nygtap, ikitaraplaýyn gatnaşyklary dürli ugurlar boýunça, şol sanda syýasy, söwda-ykdysady we medeni-ynsanperwer ulgamlarda ösdürmek üçin ähli tagallalary etmäge taýýardygyny tassyklady.
Milli parlamentiň ýolbaşçysy döwlet Baştutanynyň adyndan diplomaty jogapkärli wezipä bellenilmegi bilen gutlap, oňa iki ýurduň arasyndaky dostlukly gatnaşyklary, özara bähbitli hyzmatdaşlygy pugtalandyrmak boýunça alyp barjak işinde üstünlikleri arzuw etdi. Şunuň bilen baglylykda, özara düşünişmegi we ynanyşmagy pugtalandyrmak, netijeli döwletara hyzmatdaşlygy giňeltmek maksady bilen, ýakyn parlamentara gatnaşyklary ýola goýmak teklip edildi.
ORIENT news
