Russiýa, Ukraina we ABŞ Abu-Dabidäki gepleşikleriň ilkinji gününi tamamladylar
10-njy noýabrda Abu-Dabide Russiýanyň, Ukrainanyň we ABŞ-nyň üçtaraplaýyn gepleşikleriniň ilkinji güni tamamlandy. Köpçülikleýin habar beriş serişdeleriniň maglumatlaryna görä, duşuşyk takmynan dört sagat dowam etdi.
Gepleşikleriň 11-nji noýabrda dowam etdirilmegine garaşylýar.
Bu 2026-njy ýylyň fewral aýyndan bäri üç ýurduň wekilleriniň gatnaşmagyndaky şeýle görnüşdäki ilkinji duşuşykdyr.
Ukrainanyň Prezidenti Wladimir Zelenskiý gepleşikleri «konstruktiw we diýseň mazmunly» diýip häsiýetlendirdi. Onuň sözlerine görä, taraplar ýesirleri boşatmak, ynsanperwer çäreler, Ukraina üçin howpsuzlyk kepillikleri, olaryň uzak möhletleýin ýerine ýetirilmegini üpjün etmegiň mehanizmleri we dartgynlygy peseltmek boýunça ädimler barada pikir alyşdylar.
France 24 neşiriniň habar bermegine görä, ABŞ-nyň döwlet sekretary Marko Rubio Parižde G7 duşuşygyndan soň gepleşikleriň ilkinji gününi «örän netijeli» diýip atlandyrdy.
Russiýanyň daşary işler ministri Sergeý Lawrow gepleşikler barada has giňişleýin maglumatlaryň soňrak beriljekdigini aýtdy.
Ýewropa Bileleşiginiň haýal etmän atyşygy bes etmek baradaky talabyny teswirläp, Lawrow mundan beýläkki şertler aýdyňlaşdyrylmazdan, Moskwanyň şeýle ädime razy bolmajakdygyny belledi.
SSTV+-niň habar bermegine görä, Abu-Dabidäki gepleşikler 11-nji noýabrda dowam etdiriler. Ilkinji günüň netijesinde anyk ylalaşyklaryň gazanylandygy barada habar berilmedi.
