Owganystan TOPH taslamasyny halkara derejede maliýeleşdirilmek işiniň gaýtadan dikeldilmegine umyt bildirýär
Owgan tarapy Türkmenistan - Owganystan - Pakistan - Hindistan (TAPI) gaz geçiriji taslamasynyň durmuşa geçirilmegi üçin bankara maliýeleşdiriş kanallarynyň tiz wagtda başlamagyna umyt baglaýar. Bu barada Owganystanyň Aşgabatdaky söwda attaşesi Muhammet Harun Saidi "TASS" habarlar agentliginiň habarçysyna aýtdy.
“Biz banklarda doňdurylan maliýe serişdelerimiziň tiz wagtda elýeterli bolmagyny we taslamany maliýeleşdirjek we goldajak halkara düzümleriniň ýollarynyň açylmagyny isleýäris. Gatnaşyjy ýurt hökmünde biziň TOPH-daky maliýeleşdirmeli paýymyz 150 million dollara deň"-diýip, ol aýtdy.
Şeýle hem goňşy döwletiň Türkmenistandaky söwda wekili TOPH taslamasynyň gatnaşyjy ýurtlarda işewürligiň mundan beýläk-de ösmegi üçin uly mümkinçilikleri döretjekdigini we olary has ýakynlaşdyrjakdygyny aýtdy.
TOPH taslamasy Türkmenistandan Pakistana, Owganystana we Hindistana gaz ibermäge mümkinçilik döretjek taslamadyr. Bu taslama 4 ýurduň çäginden geçer: Türkmenistanyň günortasyndaky "Galkynyş" gaz ýatagyndan gözbaş alýan gaz geçiriji Owganystanyň Hyrat we Kandagar, Pakistanyň Kwetta we Multan şäherleri boýunça Hindistanyň Fazilka şäherine çenli uzar. Bu taslamany gurmak boýunça gepleşikler 1990-njy ýyllaryň ortalaryndan bäri dowam edýär. 2022-nji ýylyň mart aýynda Aziýanyň Ösüş Banky BMG-niň we iri dünýä ykdysadyýetleriniň Owganystanyň täze hökümetini ykrar edýänçä maliýeleşdirmek işini wagtlaýyn togtatýandygyny mälim etdi.
ORIENT news
