Döwlet elektron hyzmatlary portalyny näme üçin peýdalanmaly?
Türkmenistanyň Ministrler Kabinetiniň ýanyndaky Ulag we kommunikasiýalar agentliginiň "Türkmenaragatnaşyk" agentliginiň “e.gov.tm” domenli Döwlet elektron hyzmatlary portaly ilata hödürlenilýän elektron aragatnaşyk hyzmatlarynyň ähli görnüşlerini özünde jemledi.
Häzirki wagtda bu web-portalda hödürlenýän hyzmatlaryň sany 500-den geçýär we öz gezeginde bu hyzmatlardan peýdalanýan ulanyjylaryň sany hem yzygiderli artýar.
e.gov.tm - bu raýatlara döwlet hyzmatlarynyň ähli görnüşlerini onlaýn peýdalanmaga mümkinçilik berýän häzirki zaman onlaýn platformadyr. Onuň "Android" we "IOS" operatiw düzümli elektron enjamlara ýükläp alyp bolýan mobil programmalary hem hereket edýär. Onuň islendik ýaşdaky ulanyjy üçin düşnükli we ýönekeý interfeýs gurluşy bar.
Döwlet elektron hyzmatlarynyň portaly iki dilde - türkmen we rus dillerinde elýeterlidir.
Onda döreden şahsy hasabyňyz arkaly aragatnaşyk we onlaýn hyzmatlaryny oturan ýeriňizde ulanyp, töleg geçirip, sargyt edip, bilet satyn alyp hem-de “onlaýn kitaphana” we “elektron mekdep” hyzmatlaryndan peýdalanyp bilersiňiz. Şeýle hem, platforma arkaly onlaýn hukuk kömegini hem alyp bolýar.
Onlaýn platformada howa maglumaty we Türkmenistanyň Merkezi banky tarapyndan gije-gündiziň dowamynda kesgitlenen walýuta hümmeti bilen tanyşmak mümkinçiliklerine hem eýedir.
“Türkmenaragatnaşyk” agentligi elektron hyzmatlar portalynyň mümkinçiliklerini yzygiderli ýokarlandyrýar we ulanyjylar üçin amatly bolar ýaly işini kämilleşdirýär.
ORIENT news
