BAE-niň iri telekommunikasiýa kompaniýasy 4 günlük iş hepdeligine geçýär
Birleşen Arap Emirlikleriniň ozal “Etisalat Group”, häzirki wagtda bolsa, gysgaça “e&” ady bilen tanalýan iri telekommunikasiýa kompaniýasy käbir işgärler üçin hepdede 4 günlük iş tertibine geçmek meýilnamasyny synagdan geçirýär.
Arap kompaniýasy şeýle etmek bilen, iş ýerinde çeýeligi üpjün etmek baradaky ählumumy çagyryşy kabul eden ilkinji tehnologiýa kompaniýasy boldy. “Iş ýerindäki strategiýalary gowulandyrmagyň zerurdygyna düşünýäris. Umumy kabul edilen köne kadalara garşy çykmak, täzelerini synag arkaly öwrenmek, işgärleriň we kärhanalaryň ösüşi üçin has täsirli we amatly şert döretmek möhümdir” diýip, “e&” kompaniýasynyň işgärleri saýlap almak boýunça direktory Dena Almansuri belleýär.
Kompaniýa eýýäm gibrid görnüşde işleri ýöretmek usulyny peýdalanýar. Onda işgärler hepdede iki gün uzak aralykdan işleýärler.
Şeýle günleriň biri anna gününe düşýär we ony işgärler “Ýaşyl anna” diýip atlandyrýarlar. Bu edara ýerlerinde energiýa sarp edilişini we ulagda uglerod zyňyndylaryny azaltmak arkaly durnuklylyga ygrarlylygy görkezýär.
Bütindünýä ykdysady forumy (WEF) tarapyndan neşir edilen gözlegiň netijesine görä, bu model özüniň netijeliligini eýýäm subut etdi. Ol işgärleriň abadançylyk we öndürijilik derejesini ýokarlandyryp, daşky gurşawa uly goşant goşýar.
ORIENT news
