SpaceX smartfonlary göni Starlink-e birikdirer
Amerikaly telekeçi Ilon Maskyň SpaceX kompaniýasy dekabr aýynda Starlink hemralaryny ulanmak arkaly öýjükli aragatnaşygy synag etmäge başlamagy meýilleşdirýär. Şeýlelikde, smartfonlar SpaceX kompaniýasynyň ählumumy hemra aragatnaşyk ulgamyna göni birikdiriler.
Kompaniýa synaglary geçirmägä ygtyýarnama almak üçin ABŞ-nyň Aragatnaşyk boýunça federal toparyna ýüz tutdy.
Synaglar 10-njy dekabrda başlanar we 180 gün dowam eder. Şol döwürde SpaceX mobil aragatnaşyk ulgamynda işleýän T-Mobile kompaniýalar topary bilen hyzmatdaşlykda emeli hemralardan 2 müň sany barlag enjamyna signallary ibermek üçin öýjükli aragatnaşyk operatorynyň ygtyýarlandyrylan ýygylyk spektrini ulanmak arkaly öýjükli aragatnaşygy synag etmegi meýilleşdirýär.
Ilkinji tapgyrda kompaniýa hemra-öýjükli aragatnaşygy ýurdyň 13 etrabynda, şol sanda Kaliforniýa ştatynyň Mauntin-Wýu şäherinde, Kanzas ştatynyň Kanzas-Siti şäherinde we Tehas ştatynyň Hýuston şäherinde synag etmegi göz öňünde tutýar.
