Eýranyň Daşary işler ministrligi Türkmenistan bilen gatnaşyklary giňeltmek kararyna gelendigini mälim etdi
Eýran tarapyndan Türkmenistana täze ilçi hökmünde teklip edilen diplomat Ali Mojtaba Ruzbahani, Aşgabat şäherine gitmezden ozal Eýranyň Daşary işler ministri Hoseýn Amirabdollahian bilen duşuşdy.
Ruzbahani ministre Eýranyň diplomatik missiýasynyň işiniň ugurlary barada hasabat berdi we Eýran bilen Türkmenistanyň arasyndaky hyzmatdaşlygy giňeltmek we ösdürmek baradaky meýilnamalaryny düşündirdi diýip, Eýranyň Daşary işler ministrliginiň neşirinde aýdylýar.
Duşuşygyň dowamynda Amirabdollahian, Eýranyň goňşy syýasatynda Türkmenistanyň ýagdaýyna ünsi çekdi we Eýran hökümetiniň iki ýurduň arasyndaky gatnaşyklary giňeltmek hem-de bu ugurda hyzmatdaşlygy çuňlaşdyrmak ugrundaky berk tutanýerliligini belledi.
Şeýle hem, Eýranyň Daşary işler ministri Yslam respublikasynyň daşary gatnaşyklarynda özara hormat we bähbit ýörelgesine ünsi çekdi we iki döwletiň baştutanlarynyň arasynda gazanylan şertnamalaryň we ylalaşyklaryň durmuşa geçirilmeginiň soňky ýyllarda gepleşikleriň esasy meselesidigini aýtdy.
Ruzbahani, Eýranyň Türkmenistandaky dokuzynjy ilçisi bolar. Ol ondan öň Eýranyň Daşary işler ministrliginiň Arkalaşygyň we Günbatar Aziýa bölüminiň başlygynyň orunbasary, Günbatar Aziýa bölüminiň baş müdiriniň orunbasary, Daşary ýurt habar beriş serişdeleriniň baş müdiri, Omandaky Eýranyň ilçihanasynyň başlygynyň orunbasary hem-de Filippinlerde we Gyrgyzystanda Eýranyň ilçisi bolup işledi.
ORIENT news
