Türkmenistanyň ýol-ulag düzümi Özbegistany Russiýa bilen baglanyşdyrar
Türkmenistanyň ýol-ulag düzümi Özbegistany Russiýanyň Hazar deňzindäki portlary bilen özara baglanyşdyrar. Şeýlelikde, Özbegistan Demirgazyk - Günorta halkara ulag geçelgesine birikmäge oňat mümkinçilik alar. Bu boýunça Russiýa Federasiýasynyň we Özbegistan Respublikasynyň ulag ministrleri Witaliý Sawelýow we Ilhom Mahkamow degişli ylalaşyga geldiler diýip, Özbgegistanyň köpçülikleýin habar beriş serişdeleri mälim edýär.
Häzirki wagtda Özbegistan sebitde bar bolan ähli ulag-logistika mümkinçilikleir ýerlikli ulanmak arkaly öz önümlerini dünýä bazaryna diwersifikasiýalaşdyrmak ugrunda iş alyp barýar. Türkmenistanyň demir ýollarynyň ulanylmagy şeýle ädimleriň biri bolup biler.
Ýakynda Russiýa Owganystanyň üsti bilen Pakistanyň deňiz portlaryna çykýan ulag geçelegesini goldaýandygyny özbek tarapyna mälim etdi. Transowgan demir ýol geçelgesi Demirgazyk - Günorta ulag geçelgesine goşmaça şaha bolmak bilen 760 kilometr töweregi uzar. Bu taslamany durmuşa geçirmegiň bahasy 6 milliard dollar möçberinde bolar.
Täze ulag geçelgesi Özbegistandan Pakistana ýük daşalyşyna sarp edilýän wagty 40 göterim azaldar.
ORIENT news
