Türkmen alymy derman senagatynda ýowşan ekstraktyny ulanmagy teklip edýär
Türkmenistanyň Ylymlar akademiýasynyň Himiýa institutynyň alymlary ýowşanyň sitwar görnüşinden gury ekstrakt almagy başardylar. Institutyň aspiranty, ylmy işgäri Berdi Berdiýew bejeriş üçin ýokary netijeli we ekologiýa taýdan bähbitli aýratynlyklaryny açyp görkezdi.
Bu ekstrakt derman senagatynda dürli görnüşli derman serişdeleri taýýarlanylanda giňden ulanylyp bilner. Sitwar ýowşanynyň ekstrakty häzirki zaman biotehnologiýa enjamynyň kömegi bilen alyndy.
Türkmenistanda ýowşanyň jemi 32, Köpetdagda bolsa 11 görnüşi ösüp, şolaryň 4-si endemikdir. Lukmançylyk ekstrakty taýýarlananda onuň Köpetdagda bitýän bir görnüşi peýdalanyldy. Alymyň belleýşi ýaly, bu görnüşleriň her biriniň aýrtynlygy Gurbanguly Berdimuhamedowyň “Türkmenistanyň dermanlyk ösümlikleri” atly gollanma eserlerinde giňişleýin beýan edilýär.
Alnan ekstrakt ýokanç we ýokanç däl keselleri, şol sanda öýkendäki çişleri bejermekde we öňüni almakda gaýtalanmajak bejeriş häsiýetine eýedir. Ol mikroblara garşy hem oňat serişdedir. Şeýle hem, ol bedende döreýän howply hadysalaryň öňüni alýar.
Sitwar ýowşanyndan alnan dermanlyk ekstrakty derman senagatynda peýdalanmak üçin örän oňaýly işläp taýýarlamadyr. Ýeri gelende bellesek, Türkmenistanyň Prezidentiniň 2022 – 2028-nji ýyllarda ýurdumyzy durmuş-ykdysady atýdan ösdürmek Maksatnamasynda hem ýerli çig mal serişdelerini ulanyp, milli senagaty ösdürmäge uly üns berilýär.
ORIENT news
