“Kitap Duşanbe-2023” sergisinde Türkmenistan barada kitap neşirleri hödürlenýär
Täjigistanyň paýtagtynda 3-nji oktýabrda “Kitap Duşanbe-2023” 11-nji Halkara kitap sergisi açyldy. Sergide Türkmenistanyň Ilçihanasy bilen Täjigistanda akkreditirlenen diplomatik korpusy birlikde Türkmenistan baradaky dürli edebiýatly diwarlygy gurady.
Milli öwüşgünde bezelen türkmen diwarlygy, Türkmenistanyň daşary we içerki syýasatyna we döwletiň Garaşsyzlyk ýyllarynda gazanan üstünliklerine bagyşlanan kitaplary we neşirleri hödürledi. Bu sergide Halk Maslahatynyň Başlygy Gurbanguly Berdimuhamedowyň eserleri aýratyn orny eýeleýär.
Şeýle hem baý, köptaraply türkmen medeniýeti, taryhy we sungaty barada gürrüň berýän çeper eserler, ylmy işler we döwürleýin neşirler hödürlenýär.
Ilçihananyň işgärleri sergide Türkmenistan bilen Täjigistan Respublikasynyň arasynda diplomatik gatnaşyklaryň ýola goýulmagynyň 30 ýyllygyna bagyşlanyp ýörite neşir edilen žurnalyň tanyşdyryş dabarasyny geçirdiler. Bu çärä Täjigistan Respublikasynyň Medeniýet ministrliginiň, Milli kitaphanasynyň we Täjigistanyň Milli muzeýiniň ýolbaşçylary we işgärleri, Duşenbedäki diplomatik korpusyň wekilleri hem-de jemgyýetçilik wekilleri we talyplar ýaşlar gatnaşdylar. Bu barada Türkmenistanyň daşary syýasat edarasynyň metbugat gullugy habar berýär.
ORIENT news
