Türkmenistanyň daşary işler ministri we ÝB-niň ilçisi ýokary derejedäki saparlary guramak meselelerini ara alyp maslahatlaşdy
Daşary işler ministri Raşid Meredow Ýewropa Bileleşiginiň Türkmenistandaky ilçisi Beata Peksi kabul etdi. Ilçi özüniň ynanç hatlarynyň nusgalaryny gowşurdy.
Ministr ilçini wezpesine bellenmegi bilen gutlady we diplomatik işinde oňa üstünlikler arzuw etdi. Gepleşikleriň dowamynda taraplar Türkmenistan bilen ÝB-niň arasyndaky ikitaraplaýyn görnüşde we “Ýewropa Bileleşigi - Merkezi Aziýa” formatynyň çäginde hyzmatdaşlygyň güýçlenýändigini bellediler.
Ýokary derejedäki saparlary guramak meseleleri hem ara alnyp maslahatlaşyldy diýip, Türkmenistanyň Daşary işler ministrliginiň metbugat gullugy öz beýanynda habar berdi.
Şeýle hem Merkezi Aziýada ekologiýa we suw baýlyklaryny dolandyrmak pudagynda söwda-ykdysady, ulag we üstaşyr, energiýa, bilim ulgamlaryndaky hyzmatdaşlygy ösdürmek barada giňişleýin pikir alşyldy.
Bu nukdaýnazardan, “BOMCA”, “CADAP”, “Erasmus+” we ş.m. ýaly Merkezi Aziýa üçin sebitleýin ÝB-niň maksatnamalarynyň we taslamalarynyň durmuşa geçirilmegi boýunça gowy utgaşdyrylan bilelikdäki işler bellendi.
ORIENT news
