“Uglerod neýtrallygyna tarap: Bilim, Tehnologiýa we Zehin”
2023-nji ýylyň 1-2-nji oktýabry aralygynda Hytaýyň nebit uniwersitetiniň (Pekin) 70 ýyllygy mynasybetli geçirilen “Uglerod neýtrallygyna tarap: Bilim, Tehnologiýa we Zehin” atly halkara maslahata Ýagşygeldi Kakaýew adyndaky Halkara nebit we gaz uniwersitetiniň rektory hem-de wekili gatnaşdy. Halkara maslahaty 3 forum boýunça yzygiderli geçirildi:
-
Uglerod neýtrallygy boýunça bilim ulgamy;
-
Uglerod neýtrallygy babatda ylmyň we tehnologiýanyň gelejegi;
-
Uglerod zyňyndylaryny neýtrallaşdyrmak boýunça ýaş zehinler.
Maslahatyň “Uglerod neýtrallygy babatda ylmyň we tehnologiýanyň gelejegi” forumunda Ýagşygeldi Kakaýew adyndaky Halkara nebit we gaz uniwersitetiniň rektorynyň “Türkmenistanyň nebitgaz pudagynda ylym, bilim we innowasion tehnologiýalar” atly tema boýunça çykyşy diňlenildi.
Halkara maslahatda uglerod neýtrallygyny gazanmak we ýaşyl energiýa geçilmegini çaltlandyrmak babatda meseleler ara alnyp maslahatlaşyldy. Bu halkara maslahat uglerod neýtrallygyny we adamzadyň durnukly ösüşini üpjün etmekde bütindünýä energetika ulgamynda ylym, bilim we tehnologiýa babatda ýaş zehinleriň arasynda pikir alyşmaga hem-de bilim we tejribe toplamaga uly ýardam berdi.
2023-nji ýylyň 2-nji oktýabrynda ylym-bilim ulgamynda ýakyndan hyzmatdaşlyk etmek maksady bilen Ýagşygeldi Kakaýew adyndaky Halkara nebit we gaz uniwersiteti bilen Hytaýyň nebit uniwersitetiniň arasynda özara düşünişmek hakynda Ähtnama gol çekildi.
ORIENT news
