Türkmenistanyň Bütindünýä syýahatçylyk guramasynyň Baş assambleýasynyň 25-nji sessiýasyna gatnaşmagyna garaşylýar
Türkmenistanyň, Bagam adalarynyň, Monakonyň, Indoneziýanyň, Portugaliýanyň, Sýerra-Leonyň, Bahreýniň we beýleki ýurtlaryň syýahatçylyk edaralarynyň we guramalarynyň Bütindünýä syýahatçylyk guramasynyň Baş assambleýasynyň 25-nji sessiýasyna gatnaşmagyna garaşylýar. Bu ýubileý sessiýa 16 – 20-nji oktýabrda Özbegistanyň Samarkant şäherinde geçiriler diýip, akchabar.kg neşiri habar berýär.
159 döwletden agzalary bolan bu guramanyň sessiýasy her 2 ýyldan bir gezek geçirilýär. Onuň şu gezekki sessiýasynda syýahatçylyk pudagynda halkara hyzmatdaşlyk temalaryna seredilip, onuň çäklerinde maýa goýum we bilim forumlary geçiriler.
Bütindünýä syýahatçylyk guramasynyň Baş assambleýasynyň nobatdaky sessiýasynda iň gowy syýahatçylyk obalary mälim ediler. Dünýäniň dürli künjeklerinden bolan bu syýahatçylyk obalary ýaşaýjylaryň bagtyýar durmuşyny üpjün edýän, ykdysady, durmuş we ekologiýa deňagramlygyny goldaýan syýahatçylyk infrastrukturasy bolmalydyr.
ORIENT news
