Aşgabatda Bütindünýä gümrük guramasynyň Baş sekretary bilen duşuşyk geçirildi
Türkmenistanyň Döwlet gümrük gullugynyň başlygy Aşgabada sapar bilen gelen Bütindünýä gümrük guramasynyň Baş sekretary Kunio Mikuriýa bilen duşuşdy.
Söhbetdeşligiň barşynda, Türkmenistanyň Döwlet gümrük gullugy bilen Bütindünýä gümrük guramasynyň arasynda gazanylan özara gatnaşyklaryň derejesi barada pikir alşylyp, taraplar ikitaraplaýyn hyzmatdaşlygyň oňyn ösüşini bellediler. Soňky 2 ýylda Türkmenistan 4 sany gümrük konwensiýasynyň agzasy boldy. Şeýle-de, Ýaponiýanyň gümrük edarasy tarapyndan maliýleşdirilýän Guramanyň 2023-2024-nji ýyl üçin hünär ösüş maksatnamasyna Gullugyň işgäriniň birnäçe ýurtdan dalaşgärleriň arasyndan saýlanylmagy kanagatlanma bilen bellendi.
Soňra Döwlet gümrük gullugynyň merkezi edarasyna gelmeginiň çäginde, Baş sekretar gümrük gullugynyň alyp barýan işi, bu ýerde işiň guralyşy, döredilen mümkinçilikler bilen giňden tanyşdy. Ol binada ýerleşýän iş otaglara, mejlisler zalyna, kitaphana baryp gördi. Binanyň birinji gatynda ýerleşýän seljeriş merkezinde uly monitorda myhmana Türkmenistanda gümrük ulgamynyň guralyşyny we aýratynlyklary beýan edilýän wideo ýazgy görkezildi.
Kunio Mikuriýa, şeýle hem, Gullugyň muzeý otagyna baryp, Türkmenistanda gümrük gullugynyň döredilmeginiň we ösüşiniň taryhy bilen tanyşdy hem-de hormatly myhmanlar kitabynda ýadygärlik ýazgy galdyrdy.
ORIENT news
