Ankarada Türkmenistanyň Garaşsyzlyk güni mynasybetli halkara konferensiýasy geçirildi
Ankaradaky Türkmen ilçihanasy EkoAvrasiya gaznasy bilen bilelikde Türkmenistanyň Garaşsyzlygynyň 32 ýyllygyna bagyşlanan halkara konferensiýa gurady. Çäre 26-njy sentýabrda Türkiýe Respublikasynyň Prezidentiniň köşk toplumynda ýerleşýän Prezident kitaphanasynyň binasynda geçirildi.
Maslahata Türkiýäniň parlamentiň, Daşary işler ministrliginiň we Medeniýet ministrliginiň, daşary ýurtlaryň diplomatik wekilhanalarynyň, şeýle hem jemgyýetçilik-syýasy guramalaryň, döredijilik we ylmy intelligensiýanyň wekilleri, türkmen diasporasy, türkmen talyplary we metbugat işgärleri gatnaşdylar.
Maslahatyň açylyşynda häzirki wagtda Prezidentimiz Serdar Berdimuhamedowyň we Milli Lideriň, Halk Maslahatynyň Başlygy Gurbanguly Berdimuhamedowyň ýolbaşçylygynda Türkmenistanyň uly özgerişliklerden ynamly ýöräp, bellenen wezipeleri üstünlikli çözýändigi we munuň üçin iň möhüm şertiň, bitaraplyk ýörelgelerine esaslanýan ýurduň saýlanan halkara hyzmatdaşlygydygy bellendi.
Umumy mejlisde çykyş edenler Türkmenistanyň daşary syýasatda we diplomatiýada, ykdysady pudaklary hemmetaraplaýyn döwrebaplaşdyrmakda, sebitleýin ähmiýetli milli maksatnamalary we taslamalary durmuşa geçirmekde gazanan üstünlikleri barada öz pikirleri bilen paýlaşdylar.
Soňra konferensiýa dört mowzuklaýyn bölümde işini dowam etdirdi. Bu ýerde Türkmenistan bilen dürli ugurlarda hyzmatdaşlygyň mümkinçilikleri has jikme-jik ara alnyp maslahatlaşyldy.
Çäräniň çäginde Türkmenistanyň Garaşsyz ösüş ýoluny aýdyň görkezýän sergi açyldy. Şeýle hem sergide türkmen amaly-haşam sungatynyň ajaýyp nusgalary, halylar we şaý-sepler görkezildi.
Kitap stendlerinde türkmen halkynyň Milli Lideri Gurbanguly Berdimuhamedowyň eserleri, häzirki zaman Türkmenistan, türkmen halkynyň asyl däp-dessurlary hakda suratly neşirler görkezildi.
Maslahatyň ahyrynda oňa gatnaşyjylara türkmen tagamlary hödürlendi.
ORIENT news
