Ýewropanyň Täzeleniş we ösüş banky Türkmenistanda wençur işewürliginiň ösmegine ýardam edýär
Ýewropanyň Täzeleniş we ösüş banky Ýewropa Bilelelşiginiň maliýe ýardamy bilen Aşgabatda wençur maýa goýumlaryna bagyşlanan okuw sapaklarynyň täze tapgyryny gurady.
Maglumat: Wençur maýa goýumy – bu ýaş, geljegi uly ýöne ýeterlik töwekgelçiligi bolan maýa goýum görnüşidir. Onda maýa goýujylar kompaniýanyň gymmatynyň artmagy netijesinde köp girdeji gazanýarlar.
Ýewropanyň Täzeleniş we ösüş bankynyň taslamasy eýýäm ýurdumyzda biznes angelleriniň ilkinjileriniň kemala gelmegine şert döretdi. Biznes angeller – bular öz artykmaç pul serişdesini startapy goldamak üçin sarp edýän telekeçilerdir we tejribeli hünärmenlerdir.
Türkmenistanda gönüden-göni geljegi uly startap başlangyçlaryny gözleýän we goldaw berýän hususy kärhanalar hem döräp başlady. Ýewropanyň Täzeleniş we ösüş bankynyň guran okuwyna şeýle kompaniýanyň wekili hem gatnaşdy.
Okuwa gatnaşyjylar wençur maýa goýumynyň hukuk taraplary, irki tapgyrda startap başlangyjyna baha bermek, startapa maýa goýlandan soňky aragatnaşyk boýunça öwrendiler.
Okuwlar “MCT Agency” konsalting kompaniýasynyň tejribeli bilermenleri tarapyndan geçirilýär. Oňa gatnaşyjylar özlerini gyzyklandyrýan soraglary ara alyp maslahatlaşmaga hem mümkinçilik aldylar.
ORIENT news
