Merkezi Aziýadan ÝB-niň paýtagtyna çenli medeni syýahat: Ýewropa Parlamentinde sergi
Sişenbe güni, 19-njy sentýabrda Brýusselde, Ýewropa Parlamentiniň binasynda açylan sergi «Gözýetimleri ýakynlaşdyryp: Merkezi Aziýadan we Mongoliýadan Ýewropa Bileleşigine çenli medeni syýahat» diýip atlandyrylýar.
Sergi sebitde ýaşaýan halklaryň däplerine we durmuşyna aňsat we özüne çekiji çuňňur, ýöne reňkli syýahaty ýatladýar. Çeper senetler, milli eşikleriň nusgalary, saz gurallary, öý goşlary, şeýle hem žiwopisler we suratlar alty ýurduň - Türkmenistanyň, Gazagystanyň, Özbegistanyň, Täjigistanyň, Gyrgyzystanyň we Mongoliýanyň taryhy we medeni keşbini şekillendirýärler.
Eksponatlar ýurt boýunça toparlara bölünip, sebitiň baý medeni mirasyny - adaty dokma önümlerinden, halk aýdym-sazlaryndan başlap, binagärlige çenli her bir döredijilik aňlatmasynyň meňzeşligini we dürlüligini görkezýän mowzuklara görä saýlandy.
Serginiň açylyşyna Merkezi Aziýa we Mongoliýa boýunça Ýewropa Parlament toparynyň başlygy Tomas Zdihowski we sergä gatnaşýan alty ýurduň ilçileri gatnaşdy.
Türkmenistanyň Belgiýadaky ilçisi hödürlenen kolleksiýanyň diňe bir medeni özboluşlulygy tanatmak bolman, eýsem agzybirligiň, özara gatnaşyklaryň we umumy mirasyň täsirli habarydygyny belledi. Adamyň umumy gazananlary bolsa, köp asyrlaryň dowamynda adamlaryň we halklaryň ykballaryny birleşdirýär.
Serginiň açylyş dabarasyna Ýewropa Parlamentiniň agzalary, diplomatik wekilhanalaryň ýolbaşçylary, köp sanly Ýewropa institutlarynyň, analitik merkezleriniň we Brýusselde ýerleşýän dürli halkara guramalarynyň işgärleri, şeýle hem köpçülikleýin habar beriş serişdeleriň, ylmy we işewür toparlaryň wekilleri gatnaşdy.
Çäräniň esasy maksady ÝB bilen Merkezi Aziýa sebiti we Mongoliýanyň arasynda hyzmatdaşlygy hem-de düşünişmegi ösdürmekdir. Umumy mirasa we gymmatlyklara düşünmek, gatnaşyklary berkitmäge we alyş-çalyş hem-de ynamly aragatnaşyk üçin platforma döretmäge ýardam edýär.
ORIENT news
