Daşoguz şäherinde ýüzlerçe desgalaryň gurluşyklary alnyp barylýar
Garaşsyzlyk baýramynyň öňüsyrasynda ýurdumyzyň demirgazyk sebitiniň merkezi şäheri Daşoguzda gurluşygy alnyp barylýan ýüzlerçe desganyň ilkinji 3-siniň dabaraly açylyşy bolar. Bu barada ýurdumyzyň resmi metbugaty habar berýär.
Täze açyljak 3 ýaşaýyş jaýynyň hersi 4 gatdan ybarat bolup, olaryň 2-si 32 öýli, biri hem 16 öýlüdir. Netijede, bu jaýlar 80 maşgalany jaý bilen üpjün eder. Bu jaýlaryň gurluşyklary “Atalyk gurluşyk” hususy kärhanasynyň ussat işçileri tarapyndan ýerine ýetirildi.
Häzirki wagtda hususy kärhananyň işçi-hünärmenleri welaýat merkeziniň Zaman köçesiniň ugrunda 7 gatly jaýlaryň 12-siniň gurluşyk işlerini alyp barýarlar. Bu täze toplumdaky jaýlaryň 5-siniň her biri 42 öýli, 4-si 56 öýli, 3-si 84 öýli jaýlardyr. Häzirki wagtda bu desgalaryň diwaryny galdyrmak, köpüsiniň bolsa üstüni örtmek işleri alnyp barylýar.
Şäheriň gündogar çetinde 71 gektar çäkde jemi 1496 maşgala niýetlenen köp gatly jaýlaryň 70-si, Saglyk merkezi, 240 orunlyk çagalar bagy, 600 orunlyk umumybilim berýän orta mekdep gurulýar.
ORIENT news
