Türkmenistan we Wýetnam söwda-ykdysady pudagynda hyzmatdaşlygy giňeltmek barada ylalaşdylar
Anna güni, Türkmenistanyň we Wýetnam Sosialistik Respublikasynyň Daşary işler ministrlikleriniň arasynda wideo konferensiýa görnüşinde geňeşmeler geçirildi diýip, Türkmenistanyň Daşary işler ministrliginiň saýty habar berýär.
Diplomatlar syýasy-diplomatik, söwda, ykdysady, medeni-ynsanperwer ugurlarda türkmen-wýetnam gatnaşyklarynyň häzirki ýagdaýyny we geljegini ara alyp maslahatlaşdylar. Taraplar, ilkinji nobatda BMG-de halkara we sebit guramalarynyň çäginde döwletleriň özara täsirine ýokary baha berdiler. Şeýle hem, ikitaraplaýyn gatnaşyklar, sebit we halkara gün tertibiniň meseleleri boýunça pikir alyşmak üçin yzygiderli syýasy geňeşmeleriň depginini saklamagy ylalaşdylar.
Döwletara hyzmatdaşlygy güýçlendirmek nukdaýnazarynda bilim, ylym, sport we medeni alyş-çalyş ugurlarynda mundan beýläkki hyzmatdaşlygyň meseleleri ara alnyp maslahatlaşyldy.
Söwda we ykdysady hyzmatdaşlyk Türkmenistan bilen Wýetnamyň arasyndaky geljegi uly ugurlaryň biri diýlip atlandyryldy. Türkmen- wýetnam hyzmatdaşlygyny güýçlendirmek we işleriň gerimini giňeltmek üçin taraplar degişli döwlet edaralary bilen iki ýurduň işewür toparlarynyň arasynda birnäçe çäräni geçirmegi ylalaşdylar.
ORIENT news
