Türkmen alymlary Tokioda geçirilen halkara ylym we tehnologiýa foruma gatnaşdylar
Türkmenistanyň Ylymlar akademiýasynyň Seýsmologiýa we atmosferanyň fizikasy institutynyň wekilleri 7-8-nji sentýabr aralygynda Tokioda geçirilen “Durnukly ösüş üçin ylym we tehnologiýa” halkara konferensiýasyna gatnaşdylar. Ýaponiýanyň Ylym geňeşi tarapyndan gurnalan bu foruma dünýäniň dürli künjeklerinden hünärmenler jemlendiler.
Türkmenistanyň wekilleriniň çykyşynda BMG-nyň Durnukly ösüş maksatlaryna laýyk gelýän ýokary tehnologiýalar we ekologiýa taýdan arassa çemeleşmeler girizilen “akylly” Arkadag şäheriniň gurluşygynyň mysaly bilen ýurduň innowasiýa tejribesi görkezildi.
Çäräniň netijesinde “Tokio Beýannamasy 2023” kabul edildi. Hususan-da, halkara konferensiýa gatnaşýan ýurtlar şäherleri abadanlaşdyrmak we sanly özgertmeler üçin maýa goýumlaryny artdyrmagyň zerurdygyny aýratyn bellediler, diýip Daşary işler ministrliginiň sahypasynda Ýaponiýadaky Türkmenistanyň ilçihanasy habar berýär. Şeýle hem Ýaponiýanyň Ylym geňeşiniň Türkmenistanyň köp derejeli dolandyryş strategiýasy bilen innowasiýa geçişi arkaly DÖM-na ýetmek ugrundaky tagallalaryna ýokary baha berendigi aýdylýar.
Şeýle-de, Türkmenistan bilen Ýaponiýanyň hökümediniň arasynda tehniki hyzmatdaşlyk şertnamasynyň ýerine ýetirilmeginiň çäginde Aşgabatda we onuň daş-töwereginde seýsmologiki gözegçilik ulgamyny gowulandyrmak üçin Ýaponiýa Halkara Hyzmatdaşlyk Guramasy (JICA) bilen bilelikde gözlegleriň geçirilýändigi barada hem aýdyldy.
ORIENT news
