Türkmenistan Özbegistanda geçirilýän milli oýunlar festiwalyna gatnaşýar
60-dan gowrak döwletiň 2 müň töweregi wekiliniň hatarynda türkmen türgenleri Özbegistanyň Hywa şäherinde geçirilýän milli oýunlaryň halkara festiwalyna gatnaşýar. Onuň dabaraly açylyşy Hywa şäheriniň taryhy Içan galasynda geçirildi diýip, Türkmenistanyň resmi metbugaty habar berýär.
Bu ýerde söweş sungaty, ýaý atmak ýaly milli oýun görnüşleriniň ýaryşlary geçirilýär. Şeýle hem, bu ýerde dünýäniň dürli halklarynyň tagam festiwaly, milli önümleriniň sergileri ýaýbaňlandyrylýar.
Milli oýunlaryň birnäçesi ÝUNESKO-nyň Bütindünýä mirasynyň sanawynda orun alandyr. Şonuň üçin-de, festiwalyň guramaçylary ony geçirmek üçin gowy taýýarlyk görüpdirler. Türkmen türgenleri bu ýerde festiwaly guraýjy toparyň ýolbaşçylary bilen duşuşdy.
Türkmen halky hem milli oýunlara baý halkdyr. "Ýaglyga towusmak", "ýüzük tapdy", düzzüm, türkem göreşi ýaly milli oýunlar şolaryň esasylarydyr.
ORIENT news
