Türkmenistanyň futbol ýygyndysy ýoldaşlyk oýnunda Indoneziýa toparyndan utuldy
Türkmenistanyň futbol topary anna güni Indoneziýa topary bilen oýnady. Indoneziýanyň Surabaýa şäherinde geçirilen duşuşyk indonez toparynyň peýdasyna 2:0 hasabynda tamamlandy.
Duşuşygyň 19-njy minudynda Dendi Sulisýawan hasaby açdy. Soňra türkmen topary özüni dikeltmäge synanyşdy, ýöne Mergen Orazowyň toparynyň eden tagallalary islenilýän netijäni bermedi.
Duşuşygyň ahyrynda Türkmenistanyň topary ikinji pökgini hem sypdyrdy. Ony garşydaş topardan Maulana derwezä saldy.
Ondan öň, tälimçi Mergen Orazow, Türkmenistanyň milli ýygyndysynyň metbugat gullugyna beren beýanatynda Olimpiýa toparyna iberilen oýunçylaryň ýoklugy we käbir esasy oýunçylaryň şikesleri sebäpli topara köp sanly täze oýunçynyň çagyrylandygyny aýtdy.
12-nji sentýabrda Türkmenistanyň futbol ýygyndysy ýene bir ýoldaşlyk oýnuny geçirerler. Bahreýn toparyna garşy bu oýun Dubaýda bolar.
ORIENT news
