Doha şäherinde geçiriljek “Expo 2023” sergisinde Türkmenistanyň pawilýony taýýarlanar
2024-nji ýylyň 28-nji marty – 2-nji oktýabry aralygynda Katar Döwletiniň paýtagty Dohada geçiriljek “Expo 2023” bütindünýä sergisinde Türkmenistanyň pawilýonynyň şekil taslamasyny “Söwda öýi” hususy kärhanasy düzer we gurar. Türkmenistanyň Söwda-senagat edarasyna “Söwda öýi” hususy kärhanasy bilen degişli şertnama baglaşmaga ygtyýar berýän Karara Prezident Serdar Berdimuhamedow gol çekdi.
Türkmenistan şu ýylyň iýul aýynda Katar Döwletiniň “Expo 2023” sergisini guraýjylary bilen ählumumy sergä gatnaşmak üçin hem ylalaşyk baglaşypdy.
“Expo 2023 Doha Qatar” – ählumumy bagçylyk sergisi bolup, onuň mowzugy “Ýaşyl çöl, iň gowy daşky gurşaw” diýlip atlandyrylyp, çölleşmä, oba hojalygynyň häzirki zaman meselelerine durnukly innowasiýalary we tebigaty goramaga ýardam edýän tehnologiýalary ösdürmäge gönükdirilendir. Bütindünýä sergisine 80 döwletiň gatnaşmagyna we 3 milliondan gowrak adamyň baryp görmegine garaşylýar.
Serginiň resmi hemaýatkäri “Qatar Airways” awiakompaniýasy indiki aýdan ýolagçy uçarlaryna “Expo 2023 Doha” nyşanlaryny ýerleşdirmegi meýilleşdirýär. Mundan başga-da, awiakompaniýa ýolagçylaryna sagdyn iýmit görnüşlerini we serginiň geçirilýän döwründe Dohada ýaşamak üçin halkara syýahatçylara mugt wauçerleri hödürlemegi göz öňünde tutýar.
ORIENT news
