Türkmenistanyň we Fransiýanyň daşary işler ministrleri hyzmatdaşlyga degişli resminamalara gol çekdiler
5-nji sentýabrda Parižde Türkmenistanyň Daşary işler ministri Raşid Meredowyň Fransiýanyň Ýewropa we daşary işler ministri Katrin Kolonna bilen resmi duşuşygy boldy.
“Duşuşykda ikitaraplaýyn syýasy we diplomatik gatnaşyklary güýçlendirmek meseleleri ara alnyp maslahatlaşyldy. Bu nukdaýnazardan döwlet derejesinde saparlary guramagyň mümkinçilikleri hem göz öňünde tutuldy. Iki ýurduň daşary syýasat edaralarynyň ýolbaşçylary halkara we sebit iň derwaýys syýasy meseleleri barada pikir alyşdylar "-diýip, TDIM-niň metbugat gullugy habar berýär.
Berlen habarlarda aýdylyşy ýaly, duşuşykdan soň R.Meredow bilen K.Kolonna birnäçe ikitaraplaýyn resminamalara gol çekdiler.
Olara şular girýär: Bilim ulgamynda hyzmatdaşlyk hakynda Ähtnama, Türkmenistanyň Daşary işler ministrliginiň we Fransiýanyň Ýewropa we daşary işler ministrliginiň arasynda 2024-2026-njy ýyllar üçin hyzmatdaşlyk etmegiň maksatnamasy.
Munuň bilen birlikde, türkmen wekiliýetiniň Fransiýa eden sapary wagtynda Arkadag we Maisons-Laffite (Parižiň golaýyndaky şäher) şäherleriniň arasynda doganlaşyk gatnaşyklaryny ýola goýmak barada dostlukly ylalaşyk Jarnamasyna hem gol çekildi.
Şeýle hem, Türkmenistanyň Döwlet Daşary ykdysady iş bankynyň Union de Banques Arabes et Françaises (Arap we Fransuz banklary bileleşigi - UBAF) bilen hyzmatdaşlyk şertnamasy baglaşyldy.
Türkmenistanyň wekiliýeti fransuz tarapynyň çakylygy boýunça Pariže resmi sapar gurady diýip, Türkmenistanyň diplomatik wekilhanasy belleýär.
ORIENT news
